Bidasoaldeko bost enpresa iraunkortasunean aurrera egiten ari dira, beren karbono-aztarna kalkulatuz eta hura murrizteko planak eginez
Irun eta Hondarribiko Udalek, Bidasoa biziriken bitartez, “Bidasoa Eskualdeko Enpresen Emisioen Kalkulua eta Hobekuntza Planen Prestaketa” proiektuaren bigarren edizioa osatu dute, Gipuzkoako Foru Aldundiko Jasangarritasun Departamentuarekin sinatutako hitzarmenaren barruan. Proiektu honek eskualdeak deskarbonizazioarekin eta klima-aldaketara egokitzearekin duen konpromisoa indartzen du.
Edizio honetan, bost enpresak (ALCAD ELECTRONICS S.L., IRUNDÍN, HOTEL ATALAIA, HOTEL ETH eta GARUA ESMASA S.COOP. PEQUEÑA) aktiboki parte hartu dute, beren karbono-aztarna ariketa batean edo gehiagotan kalkulatuz eta isuriak murrizteko hobekuntza-plan bat garatuz. Ezarritako ekimenei esker, enpresa bakoitzaren isurien diagnostiko zehatza lortzeaz gain, epe laburrean murrizketa esanguratsu baterako oinarriak ezarri ahal izan dira.
Atalaia Hoteleko Cristina Muguruzak azpimarratu duenez, “proiektu hau oso beharrezkoa da gaur egun enpresentzat. Guretzat errealitate-kolpe bat bezalakoa izan da; izan ere, konturatu gara, karbono-aztarna murrizteko eta eraginkorragoak izateko gauzak egiten genituen arren, askoz gehiago egin daitekeela. Gainera, hotelean Planaren ekintza batzuk ezartzen hasi gara, eta epe ertainera jarritako helburuetako batzuk bete ditugu. Halaber, epe luzerako helburuak bete ahal izateko, lanean ari gara.
Bestalde, Alcad enpresako Unai Lenizek adierazi duenez, “ezarritako helburu horiek betetzen hasi gara Alcaden, eta hainbat ekintza egiten ari gara, hala nola garraio-flota eraginkorragoetara aldatzea, adibidez”.
Azkenik, Sonia Parada ETH Hoteleko zuzendariak ziurtatu duenez, “asko ikasi dugu, eta balio izan digu geure buruari erronkak jartzeko, hobetzeko eta karbono-aztarna murriztea ahalbidetzen diguten gauzak egiten jarraitzeko, eraginkorragoak izateko eta ingurumena zaintzeko”.
Enpresa guztiek izapidetu dute beren erregistroa MITECOn
Proiektuak zazpi hilabeteko iraupena izan du, eta hiru saio bateratu egin dira: irekitze-saio bat, lankidetza-lan bat eta itxiera-saio bat, enpresa bakoitzera egindako banakako bisitez gain. Partaidetza horren ondorioz, enpresa guztiek beren erregistroa izapidetu dute Trantsizio Ekologikoaren eta Erronka Demografikoaren Ministerioan (MITECO), eta urtea amaitu baino lehen dagokien zigilua lortzea espero da, eta horrek % 10 handituko ditu MITECO plataforman inskribatutako enpresa gipuzkoarrak.
Kalkulatutako karbono-aztarnaren datuek erakusten dute enpresa parte-hartzaileen isuriak bat datozela beren sektoreen batez bestekoarekin. Bidasoa biziriken laguntza teknikoarekin diseinatutako hobekuntza-planen helburua da 2026rako enpresen urteko isurketak % 46 murriztea batez beste, oinarri-urte gisa 2023 hartuta.
Deskarbonizazioaz haratago
Emisioak murrizteko ikuspegiaz gain, enpresek klima-aldaketara egokitzeko beharraz sentsibilizatzeko lan egin da, eta trantsizio energetikorako alternatibak aztertu dira, industrialdeetan energia-komunitateak eratzeko aukera barne.
Nuria Alzaga Bidasoa bizirikeko presidenteak nabarmendu du: “Funtsezkoa da gure enpresei jasangarritasunerako bidean lagunduko dieten eta lehiakortasuna hobetzen lagunduko dieten proiektuak bultzatzen jarraitzea”.
Bestalde, Estitxu Urtizberea Bidasoa bizirikeko lehendakariordeak gaineratu du: “Enpresek horrelako ekimenetan aktiboki parte hartzeak ingurumenarekin duten konpromisoa eta klima aldaketaren egungo erronketara egokitzeko borondatea erakusten du”.
