Energiaren Eskualdeko Mahaiak erronka berriak planteatu ditu eraginkortasun handiago baterantz aurrera egiten jarraitzeko

• Azken bi urteetan egindako jardueren balantzea egin da.

Energiaren Eskualdeko Mahaia elkartu egin da orain arte egindako ekintzak baloratzeko eta eskualdeko udalerri eta enpresei energia-eraginkortasun handiagoa lortzeko urratsak ematen jarraitzea ahalbidetuko dieten ekimen berriak proposatzeko.

Energiaren Eskualdeko Mahaiak modu positiboan baloratu ditu azken bi urteetan Gipuzkoako Foru Aldundiarekin bi urtean behin sinatutako lehen hitzarmenaren esparruan egin diren ekintza ugariak. Testuinguru horretan, iaz, Bidasoa Eskualdeko Energia Plana idatzi zen, eta sentsibilizazio- eta komunikazio-ekintza bat antolatu zen, energia aurrezteko Munduko Egunaren barruan.

Bileran izan dira Miguel Ángel Paéz, Bidasoa bizirik-eko presidentea, Estitxu Urtizberea, Bidasoa bizirik-eko lehendakariordea eta Hondarribiko Udaleko Zerbitzu Tekniko eta Mugikortasun zinegotzia, Borja Olazabal, Irungo Udaleko Kiroletako, Garapen Iraunkorreko eta Mugikortasuneko zinegotzia, Eva Fernández, Bidasoa bizirik-eko zuzendari kudeatzailea, eta Eskualdeko Garapen Agentziako eta Irun eta Hondarribiko udaletako teknikariak.

2023an, Planaren lehen ekintzak inplementatu dira, hainbat eragileren parte-hartzearekin: udalerriei aholkularitza eman zaie 04/2019 Legera egokitzeko, tokiko energia-planen garapenean eta aplikazioan, bai eta politika fiskalean irizpide energetikoak txertatzean ere; karbono-aztarnaren arloan laguntza teknikoa eskaini da eskualdeko 7 industria-enpresarekin; eskualdeko industria-enpresa batekin eraginkortasun energetikoko proiektu pilotu bat abian jarri da, edo ibilgailu elektrikoari buruzko sentsibilizazio-kanpaina bat abian jarri da ere, Mugikortasunaren Europako Astearen barruan, besteak beste.

Era berean, urte honen amaieran landu eta egiaztatuko da lehen ekintzen ezarpen-maila, energia aurrezteko mailak eta neurri horiei esker lortutako energia berriztagarriaren sarpena.

Bileraren amaieran, Miguel Ángel Páez Bidasoa bizirik-eko presidenteak adierazi duenez, “trantsizio energetikoa prozesu geldiezina da, eta erabakitasunez eta epe luzerako ikuspegiarekin ekin behar dioguna. Gure konpromisoa argia da. Energia berriztagarrien aldeko apustua egin behar dugu, eta horrek, eskualdeko jasangarritasun eta eraginkortasun energetikoan laguntzeaz gain, aukera berriak ireki ditzake jarduera ekonomiko eta enpresarialerako eta, azken batean, pertsonen ongizaterako “.

Estitxu Urtizbereak, Bidasoa bizirik-eko lehendakariordeak adierazi du “Aldaketa klimatikoaren eraginak energía gehiago kontsumitzera bultzatzen gaitu eta kontsumo igoera horrek aldaketa klimatikoan eragin ezkorrak ditu, gurpil-zoro batean sartzen gaituelarik. Gure kontsumo ereduan hausnarketa egin eta trantsizio energetikoaren aldeko pausuak eman behar ditugu, Bidasoa Biziriken kasuan neurri hauek enpresen eskura jartzeko lan eginez”.

Egungo hitzarmena

Ekintza horiek Irun eta Hondarribiko udalek, Bidasoa bizirik-en bitartez, Gipuzkoako Foru Aldundiarekin 2022-2023 aldirako sinatutako hitzarmenaren barruan daude. Hitzarmen horren helburua da jasangarritasun energetikoaren arloan ekintza bultzatzea eta eskualde osoa inplikatuko duen eragile anitzeko lan-ildoa finkatzea. Hitzarmen horren bidez, eskualdeak 100.000 euroko dirulaguntza jaso du bi urtean, energia iraunkorrarekin lotutako ekintzak, planak eta proiektuak gauzatzeko.

Gaur goizean egindako bilera hurrengo hitzarmenaren esparruan egin daitezkeen ekintzen proposamenekin amaitu da. Azken helburua trantsizio energetikoko prozesu bat bultzatzea eta aktibatzea da, eskualdeko funtsezko sektoreetan jarduketak inplementatuz eta helburu zehatzagoetan banakatuz, hala nola Irun eta Hondarribiko kontsumo energetikoak murriztea, karbono-aztarnaren prozesuan aurrera egitea eta kontsumo eta eraginkortasun energetikoak aurreztea.